!! SPARSH !!

Jeevan bana Utsav, har pal me hai Harsh

Sweekar karo Meet, Mann ka ye Sparsh…………

!!Ghoonghat se jhankti ek Soorat Saloni!!

Chandni sajaye jaise Taro ki Rangoli,

Ganga-si Shudh aur Sapno-si Jhilmil,

Saral-si lage jo “Raahe” thi Mushkil,

Kya Prabhu ne apne hatho rachi wo Kriti,

!!Saanse rahe jab tak sahej lunga har Smriti!!

Jeevan bana Utsav, har pal me hai Harsh

Sweekar karo Meet, Mann ka ye Sparsh…………

!!Shabdo me karu wyakt mai apna Aabhaar!!

Mann ke Naino se dekha jab tumhara Sansaar,

Sneh ke Aadhaar par basa Teerth koi Paawan

Shayad dekh aaya mai Radhika ka “Vrindavan”

Kya hota hai Paap aur kise kahu mai Punya,

!!Dhadkan ke bina to Hriday bhi hota Shoonya!!

Jeevan bana Utsav, har pal me hai Harsh

Sweekar karo Meet, Mann ka ye Sparsh…………

!!Shayad Jeevan ko milne laga naya Arth!!

Jiya jo ab tak wo lagne laga sab Vyarth,

Is Bandhan ke Saakshi bane hai Ishwar,

Meet ke bina to Jeevan lagta hai Nashwar,

Mila jo Meet to mera Jeevan hua Dhanya

!!Meera ki bhakti jaise Kanha ke liye Ananya!!

Jeevan bana Utsav, har pal me hai Harsh

Sweekar karo Meet, Mann ka ye Sparsh…………

!!Sanskaro ke Rang sajaate jab Do “Charitra”!!

“Parinay-Sanskar” tab ban jata sabse Pavitra

Dhaara ho jaaye Vipreet, par Lakshya rahe ek,

Seeta ne to Agni se kiya Raghupati ka Abhishek,

Nikhar jaaye Garima aur bana rahe Sammaan,

!!Meet tum rahogi hamesha Mann ka Abhimaan!!

Jeevan bana rahega Utsav, har pal me hoga Harsh

Sweekar kar lo Meet, Mann karta tumhe Sparsh…………